Acò es un raconte que moun paire mi faguè e que dato deis annado dès-e-nòu cènt-dès. Avié alor trege an.
LA VESITO DE MOUSSU LOU CURAT
La bastido de la famiho que li dihien « Lou Grand Vignoun » èro adoursado à-n-un pichoun coulet vira vers l’adré e lèu ensouleia. Lei prat à l’entour fournissien l’erbo pèr lou bestiàri de la fermo.
Pèr arriba au Vignoun, se venèn de la routo de SENEZ, fau travessa la ribiero (l’Asse de BLIEUX) sus uno plancho e arriban quàsi de plan jusqu’au davans de l’oustau. Coumo erian à la debuto dóu mes d’avoust, lou blad coupa estènt se, èro lou moumen de lou cauca ; l’iero èro sus un couletoun pèr reçaupre lou mai de vènt poussible pèr ventoula lou blad. De l’oustau à l’iero falié mounta un centenau de mètre. Moun grand e seis enfant avien coumença de cauca. Lou muou, atela au roulèu de pèiro, viravo plan-plan sus l’iero pèr faire toumba lei gran de blad de l’espigo en leissant lei poussié s’envoula subre lou ventaire.
Ero quàsi quatro ouro de l’après-dina quand ma grand veguè arriba Moussu lou curat que venié de travessa l’Asse e que prenié lou camin pèr veni faire vesito à la famiho. Ma grand diguè : « Tè, Moussu lou curat vèn nous faire vesito » e cridè au capelan : « Intras e farés coumo sabès. Finissèn la passo e descendren pèr faire lou quatr’ouro ». Lou curat li faguè un signe de la man e respoundè : « Siéu pas pressa, vous espèri ». Coumo avié l’abitudo intrè dins la cousino e veguè l’oulo sus lou fue que caufavo e durbè lou pouele pèr carga un trounc de bos dins lou fougau e, coumo avié pas encaro dina, prenguè un sietoun, durbè la mastro e agantè un pan, se n’en coupè uno bouano lesco, la metè dins lou sietoun, descurbè l’oulo, emé la loucho prenguè de bouioun, arrousè la lesco pèr la faire béure pièi s’istalè e coumencè de manja. À-n-aquéu moumen la famiho arribè pèr faire lou « goustaroun ». Quouro ma maire veguè Moussu lou curat en trin de manja li demandè de ce que manjavo. Lou curat li respoundè : « Ai vist que l’oulo tubavo e me siéu di : la soupo es caudo, n’en vau prendre un sietoun en esperant ». Alor ma grand se metè à s’escalassa e dreissant li bras en l’èr cridé : « AH ! BÈU BOUAN DIÉU !... Moussu lou curat vèn de manja lei lavagno dóu pouarc ! » e tóutei s’èron mes à rire. Lou capelan sousprés, respoundè : « Es pèr acò que l’ai trouva un pau claret ».
Aquéu paure curat èro bèn paure e manjavo pas tóutei lei jour. Urousamen que li parrouquian, chascun à soun tour li pourtavon un pau de mangiho. Avié ges de sòu e pourtavo toujour sa vièio soutano qu’èro touto chirounado, e quouro passavo au soulèu se vesié coumo un cèu d’estiéu, la nue, clafi d’estello.
Moun paire disié : « Aquéu marrias es la fe que lou tèn dre ».
Pèr acò, ma grand agantè un panié e li metè uno bello lesco de jamboun, uno dougeno d’uou, un saquetoun de noueio (nose), de froumàgi de cabro que fasié elo-memo.
Lou capelan après lei remerciamen s’en retournè à BARRÈMO.
Freju lou dès de febrié 2016
Lou Grihet Barremen
(Enri ROUVIER)